( خذوه وعدوا )

خذوه وعدوا ,, في قيسم ماعد علينا ردوا ,, هفوا اقدم عقلي

خذوه أمعاهم 
 وهو زاد لازمته ايريد دناهم

ونا قبل نحسابه خلاص نساهم 
 وهو أتقول عارفهم أساع يردوا

يحايل علي أيقول هان غلاهم 
 وهو من وراي أيود بيش يودوا

أ تقول ما تعذب يوم في سباهم 
ولا تقول بنيانا غلانا هدوا

ولا تقول لذعونا بنار خطاهم 
 ولا تقول ب السية معانا بدوا

كل ما مشينا في طريق معاهم 
 هم يسبقونا و الدروب يسدوا

الله يسامحه هلي جبد مطراهم 
 ما عمرهم للخير ديهم مدوا

ولا بيش ما كافو أنرد أكفاهم 
مانا اللي انعيبوا ولا انتعدوا

خذوه وعدوا ,, في قيسم ماعد علينا ردوا ,, هفوا اقدم عقلي

شال في جرتم 
وين ما لفوله حددوا جلوتم

يحكي وديما يجيب في سيرتم 
 ننهوه يزعل نتركوا انتكدوا

يخطر علي زمان في غيتم 
وكيف كنا ف الاصواب انقدوا

أياماً وكنا نبرموا ف جلوتم 
 افجرة غلاهم نتعبوا ونكدوا

خذينا أيام أسماح في رفقتم 
 مع طيفهم طرف الحديث انشدوا

وسط القمر تطلعلنا صورتم 
 وياما قعدنا فالنجوم انعدوا

سبحان كي بدل الله حالتم 
 هانوا رفقنا من غلانا فدوا

خذوه وعدوا ,, في قيسم ماعد علينا ردوا ,, هفوا اقدم عقلي

( انظر ايش دارو بعدي )

ونيس العوامي

هذه الكلمات رد على قصيدة الشاعر اكرم الكاسح الدرسي

انظر اشدارو ابعدي,,ا نشا الله سعدهم موش كيف اسعدي,,اعزازن أقدم انظر

انظرنصيب خذاهم

 وانظر بغيري قارنين اسماهم

انظر بطولهم ولا أكبار ضناهم

 ولا كما حالي  أندور اوحدي

نشعر ونجبد في سريب غلاهم

 هذا اللي ألقيته ف قيس أجهدي

سبحان كيف كنا زمان معاهم

 متوالفين ما احسبنا غلانا ايغدي

ظروف احكمني و الزمان زواهم

ونا غير كملته العمر اطردي

ننشد عليهم كل من راعاهم

  ايش حال من كانوا زمان اسندي

انظر اشدارو ابعدي,,ا نشا الله سعدهم موش كيف اسعدي,,اعزازن أقدم انظر

( ما نحملهن )

هذه الكلمات مشاركتي في رأس بيت الشاعر خالد المجبري 

ورأس البيت ايقول 

( ما نحملهن ,, هموم واجدة ف القلب نا شايلهن ,, في غيبتك و الله )

مشاركتي ونيس العوامي

نعاني فيهن

أهموم يا أسلام الله واحل فيه

أن نضت ناضن شابكات أيديهن

ذاكراتني حتى ونا هاملهن

كي أنقول ننساهن إيجي طاريهن

من كل جيهه واجدات أسبلهن

يسيلن دموعي طول من مآقيهن

علي شوق ليا من أسماح عللهن

ولا يرقدن في ليل نين إيجيهن

طيف الغوالي أيطل ويذيبلهن

يا الله يا حنان تلطف بيهن

أبكاهن على الغياب زاد زعلهن

( يا قلب كنك )

يا قلب كنك امعاي 

 جافيني وعايش بروحك

يا قلب قليتا هناي 

 نا جاي طالب سموحك

ما عرفنا لك راي 

 ولاعد عرفنا ميوحك

زعم واجعك مطراي

 ولا اتندم فروحك

 ما بيت للداواي 

 وكثراً عليا طروحك

أتعال خلك احذاي 

 بلكي انداوي جروحك

بعنادك قطعت الواي 

 بشرودك وكثرة اسروحك

حطيته عليك اعباي 

 في جديد جا ف طوحك

انكانك اتريد ارضاي 

 هنيني وعطيني ربوحك

( يا العين يا نواحه )

سدك ابكا يا العين يا نواحه ,, وانسي عزيز اللي أفضي مطراحة



يا رقراقــــــــــــــــــــــــــــة

انسي عزيزاً دار لك صراقة

اليوم فارقك عدى مشى بشواقة

خلاص ايسي منه ومن مرواحة

ولا عد اتجيبي سيرته ونقناقة

نا هو اللي ماعدا نريد ارباحة

بعد سيته فينا أرضيت افراقة

ما عاد يلزمني طلقت اسراحة

كان تسمعي مني عطيه اوراقة

وكفي دموعك وارقدي مرتاحة



يا مسكينـــــــــــــــــــــــــا

خوذي كلامي تربحي هنينا

حمدنا الله اللي اليوم ابرينا

وأنتي علينا ناصبه المناحة

دابيني ناسي مدارا فينا

الله والنبي ما تنقضيش جراحه

اغلبنا زمان ف لمهن والقينا

النسوة دوا لجروحهم بالراحة

من بكيتك خايف اتنوض علينا

ويبقاً أدماهن سايله نظاحه



أخذيــــــــــــــــــــــــــه كلامي

واشقي بجديد اليوم جا قدامي

راني عليك اعبيت جيتك رامي

نريدك تشوفي جلوته ورياحه

بلكي عليه أسا انحل صيامي

أنكمل به عقاب ديني نزيد صلاحه

ويقعد النور اللي ضوى ف ظلامي

ويبقنا يديه لدمعتك مساحة

كان طلتم نبقى ألقيت مرامي

ولابد هموم أكبار سا تزاحه

( قفز وين طروله لقدم )

قفز وين طروله لقدم


قفز وين طروله لقدم ,, وسيرتهم ,, علي قلبي ماني لايم


قفز وين طروهم يالاه ,, دعا مولاه ,, أيحن بعد طول امعاناه
أيجيب عزيز ألموح خذاه ,, شكا م الهم ,, بعد جور اليأس الظالم
اللي صباله دون دناه ,, عليه حكم ,, أيكمل عمره يرجاهم


قفز وين طروله لولاف ,, الخاطر صاف ,, بعدهم كل جميلة عاف 
بعد حازوا زينة لوصاف ,, بكاهن دم ,, اسنين وهو يرجا فيهم 
ولا فكر لا دار اقطاف ,, ولا لايم ,, علي صوب جديد وحوم


قفز وين طروله الحبان ,, اللي ف زمان ,, ذرا للخاطر م النيران
اللي كي يقولوا كان وكان ,, العين اتجم ,, تسيل وبرعود اتقمقم
بعد كانوا للعين أمان ,, اليوم الهم ,, أسنين وقلبي فاقدهم 


قفز وين طروله غياب ,, أصحاب الصوب المنحازين
تواروا عنا كي السراب ,, سفرهم خلف فاهق شين
عليهم دمع العين انساب ,, أتذرف ديما بتغونين 
امرض ما لقيوا له طباب ,, الا طاري ناس قديمين 
اللي توقتهم كي الشراب ,, أوقات ونحنا عطشانين
اللي كيف تجيهم تطراب ,, وتشتاق وهما قاعدين 
عرب سيرتهم كي تنجاب ,, تسر جميع المستمعين
عرب كسابه لم أرقاب ,, عصارا ماهم مربيين
زمان جاهم غازي نهاب ,, أبقوة جيش أو قلة دين 
جاهم جاير ما يحساب ,, يلاقوه أجواد فراسين
اداعوا ع الغازي بحراب ,, إصدارا صبوا متحدين 
أو سجل ماضيهم ف أكتاب ,, بعد قالوها مجتمعين 
فدا الوطن ايهونن لرقاب ,, اللي يرخص له كل ثمين 
اللي كي يطروهم لصحاب ,, انفزلهم ,, وندعي ربي يرحمهم 
قفز وين طروله لقدم ,, وسيرتهم ,, علي قلبي ماني لايم

( اسمك ربيعة )

( اسمك ربيعة )

 

إهداء خاص ل ... ؟؟؟ من ونيس العوامي

خاطرة بسيطة ارجو ان تنال اعجابكم

نا نعتذر سمحيني ,, ظروف احكمني يا ربيع اسنيني ,, علي غيبتي

ماعدا نغيب عليك

وماعد علي اتذرفي انخليك

وماعدا نخليهن اشواق اتجيك 

 مغير اذكريني احذاك سا تلقيني

قاعد وشابكهن ايدي اف ديك 

 و اللي تطلبيه انقولك من عيني

يا روح روحي نا اللي نبيك 

 يجلن اهمومك وين ما تحقيني

نا مان انروق الا علي طاريك 

 وننسى احزاني كانك جيتيني

سماحة وخفة دم رينا فيك 

 بطيبة وحنان وشوق حاضنتيني

اسمك ربيعة ونا ربيعي بيك 

 انسالك برب الكون ما تنسيني

علي غيبتي نا نعتذر سمحيني ,, ضروف احكمني يا ربيع اسنيني

( افزآع )

السلام عليكم ورحمة الله وبركاته

هذه الأبيات قد رد عليها الشاعر الكبير / اكرم الكاسح الدرسي

ومشاركته مدونة بعد هذه الأبيات

( افزآع  )
ونيس العوامي 

اجاروا جاي يا صحاب افزعولي 

 خلاص اتعبت من كثر العنا

انريد النصح منكم دبرولي 

 فيه اوحلت كيف انديرلا

فقدت عزيز كملتا بطولي 

 عدا العمر غير امقالبا

كنا اثنين ما معانا عزولي 

 متفاهمين كنا في هنا

تقازين واجد شبرولي 

 قالوا تعيش ف افراح و زها

لاكن فيه حساد بحتولي 

 نقارين ما لهم مشغلا

م العيدان واجد لقطولي 

 داروا دور قالوا سيبا

قالوا قال زادوا فوق قولي 

 نين الغبن جا بيناتنا

وين انجي يبقوا يبرمولي 

 موش تريس يحكوا ف القفا

داروا في سيا و اقطعولي 

 حبل الود بيني وبينها

وفعلاً صار كيما خططولي 

 فنانين في صنع الجفا

اهموم اكبار و اجروح خلفولي

 منهن طحت مقطوع اللوا

طريح فراش منهم ما لقولي 

 لا طباب لا لقيوا دوا

ادعوا الله يخففن احمولي 

 يلهمني الصبر في فقد الغلا

رد الشاعر الكبير /  اكرم الكاسح الدرسي

جيتك جري ياصاحب وقولي

بلكي يكون للفاهق دوا

طحت افناس كيفك هدمولي

وين فالصوب عليت البنا

ياما فيه قالو واحلفولي

فتانين مايخافو الله

ابذار الشر في صدري ابذرولي

اعلي مالقيت ملي يحصدا

متبع ناس سيه دبرولي

وبعت اعزاز من جهل وغبا

وهم اشوي كانو يقسمولي

صار اخلاف كل شي انتها

غبي ما افطنت نين جوني حكولي

وقالو طار طيرك فالسما

جرح قديم بريان انقضولي

وطرّق فوق واسّايل ادما

بكيت عليه من ظلمي وهولي

بكا مكيون في كل الضنا

ولقيت الصبر هو خيرة احلولي

وفي لولاف سا يعوض الله

( ان شاء الله خير )

( ان شاء الله خير )

نا ريت حلامة وهك عللها
 ياسامعين قولوا ان شاء الله خير

لاويني ماشي ف هذيك الجلهة 
مكان ناس معروفين بسم شهير

ومعاية وجاها ونا اللي فأولها 
 نمشي بهم دغري بلا اتعوكير

أتقول عارفهن جميع سبلها 
 افجوج ومسارب من احذا الغدير

بانن علينا ابيوت يا مجملها 
 امبجدات بانيهن استاذ خبير

وبانت اكحيلة مقلفطة باشملها 
 زول ثلبها ف النص كي الغفير

وضان تداعك علي موكلها 
 وبناويت يردن من هذاك ألبير

و خيل واجد من خيار نسلها 
 وفرسان يزابوا ف غوط كبير

بحسن الضيافة شيخهم كملها 
 واخذين قدرنا كامل بلا تقصير

قعدنا وحكينا معاهم هلها 
 وهم يسمعوا فينا بلا تكشير

جيناكم انريدوا قربكم في بلها 
 واللي تطلبوه ان شاء الله يسير

انكنم عطيتونا انكونوا هلها 
 تعيش بينا بالود و التقدير

لاوينها ف كرمود فوق جملها 
 مروح بها خزرة عيون الطير

اللي ع البسيطة ما لقيت مثلها 
 أرضيت بغلاها من بعد تفكير

ووعيت من نومي ونا شايلها 
 ونمشي بها للبيت بتمختير

يا نويرتي ها الحلم ما دام لها 
 عيني اللي رضيت بها المصير

ايفرج علي الله وانحصلها 
 ويقسم زولها ام الغثيث حرير

( رفيقي )

( رفيقي )

هذه الكلمات جأت في حق رفيقي واخي العزيز وسام سويري
بعد سفره لخارج البلاد للعلاج وبعد عودته الميمونة

أنسلم علي صاحب رفيقاً ليا 

 الله يدوما فوق راسي تاج

رفيق زين و اجوادي ولد بيتية 

 لو تقصده تكرم بما تحتاج

فزاع ع الصاحيب له غيرية 

 يذاريك كان دارت بريح عجاج

يسقيك كان أعطشت عذب أمية 

 ويوكلك زاده وما يحراج

ما يوم تسمع كلمته ملوية 

 صادق وما يقبل اللي طجاج

سويري من سويري مع سويرية 

 نزعل ان كان هو من احذايه راج

الله يحفظه من كل عين بغية 

 ونشوفه علي عرفا مع الحجاج