أصحاب الصوب: يونيو 2010

الجمعة، 25 يونيو 2010

( يا العين يا نواحه )

سدك ابكا يا العين يا نواحه ,, وانسي عزيز اللي أفضي مطراحة

يا رقراقــــــــــــــــــــــــــــة

انسي عزيزاً دار لك صراقة

اليوم فارقك عدى مشى بشواقة

خلاص ايسي منه ومن مرواحة

ولا عد اتجيبي سيرته ونقناقة

نا هو اللي ماعدا نريد ارباحة

بعد سيته فينا أرضيت افراقة

ما عاد يلزمني طلقت اسراحة

كان تسمعي مني عطيه اوراقة

وكفي دموعك وارقدي مرتاحة

يا مسكينـــــــــــــــــــــــــا

خوذي كلامي تربحي هنينا

حمدنا الله اللي اليوم ابرينا

وأنتي علينا ناصبه المناحة

دابيني ناسي مدارا فينا

الله والنبي ما تنقضيش جراحه

اغلبنا زمان ف لمهن والقينا

النسوة دوا لجروحهم بالراحة

من بكيتك خايف اتنوض علينا

ويبقاً أدماهن سايله نظاحه

أخذيــــــــــــــــــــــــــه كلامي

واشقي بجديد اليوم جا قدامي

راني عليك اعبيت جيتك رامي

نريدك تشوفي جلوته ورياحه

بلكي عليه أسا انحل صيامي

أنكمل به عقاب ديني نزيد صلاحه

ويقعد النور اللي ضوى ف ظلامي

ويبقنا يديه لدمعتك مساحة

كان طلتم نبقى ألقيت مرامي

ولابد هموم أكبار سا تزاحه

الثلاثاء، 8 يونيو 2010

الأحد، 6 يونيو 2010

( قفز وين طروله لقدم )

قفز وين طروله لقدم

قفز وين طروله لقدم ,, وسيرتهم ,, علي قلبي ماني لايم

قفز وين طروهم يالاه ,, دعا مولاه ,, أيحن بعد طول امعاناه
أيجيب عزيز ألموح خذاه ,, شكا م الهم ,, بعد جور اليأس الظالم
اللي صباله دون دناه ,, عليه حكم ,, أيكمل عمره يرجاهم

قفز وين طروله لولاف ,, الخاطر صاف ,, بعدهم كل جميلة عاف
بعد حازوا زينة لوصاف ,, بكاهن دم ,, اسنين وهو يرجا فيهم
ولا فكر لا دار اقطاف ,, ولا لايم ,, علي صوب جديد وحوم

قفز وين طروله الحبان ,, اللي ف زمان ,, ذرا للخاطر م النيران
اللي كي يقولوا كان وكان ,, العين اتجم ,, تسيل وبرعود اتقمقم
بعد كانوا للعين أمان ,, اليوم الهم ,, أسنين وقلبي فاقدهم

قفز وين طروله غياب ,, أصحاب الصوب المنحازين
تواروا عنا كي السراب ,, سفرهم خلف فاهق شين
عليهم دمع العين انساب ,, أتذرف ديما بتغونين
امرض ما لقيوا له طباب ,, الا طاري ناس قديمين
اللي توقتهم كي الشراب ,, أوقات ونحنا عطشانين
اللي كيف تجيهم تطراب ,, وتشتاق وهما قاعدين
عرب سيرتهم كي تنجاب ,, تسر جميع المستمعين
عرب كسابه لم أرقاب ,, عصارا ماهم مربيين
زمان جاهم غازي نهاب ,, أبقوة جيش أو قلة دين
جاهم جاير ما يحساب ,, يلاقوه أجواد فراسين
اداعوا ع الغازي بحراب ,, إصدارا صبوا متحدين
أو سجل ماضيهم ف أكتاب ,, بعد قالوها مجتمعين
فدا الوطن ايهونن لرقاب ,, اللي يرخص له كل ثمين
اللي كي يطروهم لصحاب ,, انفزلهم ,, وندعي ربي يرحمهم
قفز وين طروله لقدم ,, وسيرتهم ,, علي قلبي ماني لايم

( غناوة وبناتها )

قال الغناي عبد الكافي البرعصي رحمه الله

ياريتني حكيت عليه ,, سكتت ع الغلا نين انغنوا

فبدأ عدد من الشتاية بردم هذه الغناوة على النحو التالي

ياريتك ياعين حكيتي ,, ما راكي فيه انضريتي

محمد بو خليل

انطمر في صوبك ياعين ,, تقول امانة للخرين

عبد الفتاح العبيدي

ما شاكيتي بيه لوالي ,, نين انضريتي ف الغالي

عوض حامد

ساكت ع لولاف وكامي ,, نين خذوهم من قدامي

سالم مسعود

سنين ونا نكمي في نار ,, حكيت بعد صار اللي صار

محمد بوخليل

لو كان حكيت علي صوبي ,, فيه عرب راهم شقيوبي

عبد الفتاح العبيدي

حسوفة تمت تلحق فيك ,, اتدسي نين عزيز اخطيك

عوض حامد

نا وعزيز اقطع دورتنا ,,طحنا ع الجحدة ضرتنا

صالح حامد

ما بينا نحكوا ع الغالي ,, نين تندمنا ف التالي

عبد الكافي البرعصي

عند ايش انطمر في صوبه ,, نين عزيز جرا مكتوبه

محمد بو خليل

يا لولاف غلاكم كامي ,, نين كليتوني بالحامي

عياد الجملي

حتى كان الشي امقدر ,, ما نحساب الكمو ايودر

ناصر العاقوري

درتي صوب عليه بطيتي ,, جاه عجولي وانضريتي

صقر القبايلي

درت غلا كامي طاريه ,, غير خذوه اللي طرقيه

عبد السلام المهشهش

غلاهم وين خذيت عليه ,, اقسم للي مو تاعب فيه

تميت انحسف في روحي ,, وخذوا دوايين اجروحي

عوض حامد

( لو كان )

لو كان ما دناك احتمة ,, أنضر العقل ايش ايسيرله
لو كان جفوهم بأسباب ,, العقل ع الغوالي ما بكا
لو كان يا جديد اغليت ,, ع العقل راك نسيته اقدم
لو كان يا غياب عزيز ,, تمويح دار رانا انشارفوا
لو كان الوطا تنشال ,, انشيلو عزيز ومقعده
لو كان غير صدنا نوم ,, بلا عزيز رانا بعزمنا
لو كان كسر لايمناه ,, دقدق عزيز فينا كل شي
لو كان ما نريد عزيز ,, عليه ما سوايا انعدهن
لو كان نجبد التاريخ ,, علي عزيز ياما م العدد
لو كان ما لها مجبور ,, عزيز ما نزل دار الخطا
لو كان غير عندي بيش ,, ننتش عزيز من دين العدا
لو كان تتبعي يا عين ,, ديوانهم مراهين تقفلي
لو كان يا العين سقيم ,, الراي ف الرجا ما نخالفك
لو كان يا العين عليه ,, اعبيتي المرسال عوقك
لو كان فيه ها كاو هيت ,, القسم ما يلاوي ع الغلا
لو كان الغلا كي قبل ,, عندي عليك ياما من عتب
لو كان يا العين اسعدك ,, عارك امعاك ما ضاع الغلا
لو كان ما عليه ابنيت ,, القدر يا غلا راك منتهي
لو كان كل صوب اندير ,, منه ايسير ماعاد تشكمي
لو كان ف الدنا خيرت ,, ماراني غني غير بالغني
لو كان ف الغلا برهان ,, لا انجيت نا ولا انجيت يا غني
لو كان يا غني ينساك ,, العقل خير من جيب منقضك
لو كان يقسم المرهون ,, نرجوه ما علينا ف البطا
لو كان غير حقيتوه ,, الجرح يا غوالي تندموا
لو كان منشغل يا عين ,, عزيز ما جريحة سيبك
لو كان غير يبرا هذا ,, نحلف جديد ماعاد ننجرح
لو كان ما ستر مولاي ,, اندير باهرة يوم الخطا
لو كان يا عزيز خطاك ,, وخيذة انديروله فزع
لو كان بالخطا نعلام ,, ما شقيت بيك يا دورة الغلا
لو كان الغلا قتال ,, نهار الخطا راك قاضية
لو كان لا خطا لا موح ,, مع عزيز ديما هكذي
لو كان لخطاهم عزم ,, لقيت العين ما راها بكت
لو كان قسمنا شاور ,, ما صارت شماته لا خطا
لو كان نسوته القديم ,, ع العين مي صعيبة لمتا
لو كان يا ديار عزيز ,, يمحاكن الله نين نيسوا
لو كان ما بكيت امرضت ,, للدار جيت واعزاز خايلوا
لو كان غير انصيد ,, نحجر العين ع الدار و الغني
لو كان يقتلن لوهام ,, انموت نا اللي ليذات بي
لو كان ينطقن لوهام ,, يقولن اعتزنا ف القدم
لو كان يا منام الليل ,, تبقى رسيل بيني وبينهم
لو كان غير نلقى دمع ,, نبكيبه الا النوم ميسه
لو كان في اوقات النوم ,, اتجوا منام ع الموح نقدروا
لو كان قرعتي ف النوم ,, تكمل منام موحه اديارهم
لو كان واجعك يا عين ,, علي عزيز راكي باكية
لو كان يا العين الدمع ,, دوا لداك ما راك شاكية
لو كان الدموع يعمن ,, راهم كفيفين واجدن
لو كان ما بكت لولاف ,, تسقط العين من عين واجدن
لو كان ما بكيت انموت ,, اخنقت في ياما عبرتي
لو كان نا اللي نختار ,, نمشي انجيب غياب خاطري
لو كان يا الياس بطيت ,, اصغار نين لموا شملهم
لو كان ما هناك الياس ,, ما صارت امباكاه ع الغلا
لو كان حاسبين الياس ,, ما رانا بكينا ع الغلا
لو كان غير دالك ياس ,, يجيك يوم تعتاز للبكا
لو كان القديم يهون ,, لقوة جديد ع العين ساهلة
لو كان يا قديم امغير ,, اتطول في حالي يشغلك