( افزآع )

السلام عليكم ورحمة الله وبركاته

هذه الأبيات قد رد عليها الشاعر الكبير / اكرم الكاسح الدرسي

ومشاركته مدونة بعد هذه الأبيات

( افزآع  )
ونيس العوامي 

اجاروا جاي يا صحاب افزعولي 

 خلاص اتعبت من كثر العنا

انريد النصح منكم دبرولي 

 فيه اوحلت كيف انديرلا

فقدت عزيز كملتا بطولي 

 عدا العمر غير امقالبا

كنا اثنين ما معانا عزولي 

 متفاهمين كنا في هنا

تقازين واجد شبرولي 

 قالوا تعيش ف افراح و زها

لاكن فيه حساد بحتولي 

 نقارين ما لهم مشغلا

م العيدان واجد لقطولي 

 داروا دور قالوا سيبا

قالوا قال زادوا فوق قولي 

 نين الغبن جا بيناتنا

وين انجي يبقوا يبرمولي 

 موش تريس يحكوا ف القفا

داروا في سيا و اقطعولي 

 حبل الود بيني وبينها

وفعلاً صار كيما خططولي 

 فنانين في صنع الجفا

اهموم اكبار و اجروح خلفولي

 منهن طحت مقطوع اللوا

طريح فراش منهم ما لقولي 

 لا طباب لا لقيوا دوا

ادعوا الله يخففن احمولي 

 يلهمني الصبر في فقد الغلا

رد الشاعر الكبير /  اكرم الكاسح الدرسي

جيتك جري ياصاحب وقولي

بلكي يكون للفاهق دوا

طحت افناس كيفك هدمولي

وين فالصوب عليت البنا

ياما فيه قالو واحلفولي

فتانين مايخافو الله

ابذار الشر في صدري ابذرولي

اعلي مالقيت ملي يحصدا

متبع ناس سيه دبرولي

وبعت اعزاز من جهل وغبا

وهم اشوي كانو يقسمولي

صار اخلاف كل شي انتها

غبي ما افطنت نين جوني حكولي

وقالو طار طيرك فالسما

جرح قديم بريان انقضولي

وطرّق فوق واسّايل ادما

بكيت عليه من ظلمي وهولي

بكا مكيون في كل الضنا

ولقيت الصبر هو خيرة احلولي

وفي لولاف سا يعوض الله

( ان شاء الله خير )

( ان شاء الله خير )

نا ريت حلامة وهك عللها
 ياسامعين قولوا ان شاء الله خير

لاويني ماشي ف هذيك الجلهة 
مكان ناس معروفين بسم شهير

ومعاية وجاها ونا اللي فأولها 
 نمشي بهم دغري بلا اتعوكير

أتقول عارفهن جميع سبلها 
 افجوج ومسارب من احذا الغدير

بانن علينا ابيوت يا مجملها 
 امبجدات بانيهن استاذ خبير

وبانت اكحيلة مقلفطة باشملها 
 زول ثلبها ف النص كي الغفير

وضان تداعك علي موكلها 
 وبناويت يردن من هذاك ألبير

و خيل واجد من خيار نسلها 
 وفرسان يزابوا ف غوط كبير

بحسن الضيافة شيخهم كملها 
 واخذين قدرنا كامل بلا تقصير

قعدنا وحكينا معاهم هلها 
 وهم يسمعوا فينا بلا تكشير

جيناكم انريدوا قربكم في بلها 
 واللي تطلبوه ان شاء الله يسير

انكنم عطيتونا انكونوا هلها 
 تعيش بينا بالود و التقدير

لاوينها ف كرمود فوق جملها 
 مروح بها خزرة عيون الطير

اللي ع البسيطة ما لقيت مثلها 
 أرضيت بغلاها من بعد تفكير

ووعيت من نومي ونا شايلها 
 ونمشي بها للبيت بتمختير

يا نويرتي ها الحلم ما دام لها 
 عيني اللي رضيت بها المصير

ايفرج علي الله وانحصلها 
 ويقسم زولها ام الغثيث حرير

( رفيقي )

( رفيقي )

هذه الكلمات جأت في حق رفيقي واخي العزيز وسام سويري
بعد سفره لخارج البلاد للعلاج وبعد عودته الميمونة

أنسلم علي صاحب رفيقاً ليا 

 الله يدوما فوق راسي تاج

رفيق زين و اجوادي ولد بيتية 

 لو تقصده تكرم بما تحتاج

فزاع ع الصاحيب له غيرية 

 يذاريك كان دارت بريح عجاج

يسقيك كان أعطشت عذب أمية 

 ويوكلك زاده وما يحراج

ما يوم تسمع كلمته ملوية 

 صادق وما يقبل اللي طجاج

سويري من سويري مع سويرية 

 نزعل ان كان هو من احذايه راج

الله يحفظه من كل عين بغية 

 ونشوفه علي عرفا مع الحجاج

( شاطت نارا )

( شاطت نارا )

خطم قديم اليوم شاطت نارا
 خطر علي ماضي زمان توارا

هلـــب كدانـــــــــي
 خزر في خطرهن علي احزاني

جروحا زمان اللي بهن كافاني
 بعد ما شريتا باعني بخسارا

نحسابهن برين وراق زماني
 ناظن اتقول جيوش دارن غارا

خلاني انتخبط من جديد انعاني
 اطريلي كما اللي جايتا خبارا

تميت انتلفت وانقلب ميزاني
 مثيل من خلطن عليه افكارا

يا ريتني ما ريتــــا
 بعد ما قهرني في زمان انسيتا

تمنيت لو انعميت ما حقيتا
 ولا من احذايا جايبه مشوارا

خطم علي غفلة حذاي القيتا
 انشلن اطرافي رحت في تيارا

والله كان القيت ما راجيتا
 راني جريت بعيد نين توارا

لو حسبت هك ايسير ما غاليتا
ولا جيت شورا ولا عرفت اديارا

خطم قديم اليوم شاطت نارا
 خطر علي ماضي زمان توارا

( عبيت رصيد )

( عبيت رصيد )

عبيت نا منهن اليوم رصيد ** ياس وعنا وجروح في أتكيد

زاد رصيـــــــــــــــــــــــــــــــــدي

و زادن امعاه افواهقي وتنكيدي

وأخرى زاد قهري وعلتي وتنهيدي

بعد ما علمته دار صوب جديد

الغالي اللي كاين مناي أو ريدي

تما غريب اليوم راح بعيد

ع الصوب علمته قراه من أيدي

وعطيتا عليه أمثال قتله زيد

بعد ما تعلم ، خالف أمواعيدي

عزق حيطتي ماعد غلاي أيريد

رصيد أهمــــــــــــــــــــــــــوم

مع اللي امعاي أبقيت في ديموم

زادن أوجاعي من خطاه اليوم

قالي خطاني من طريقي حيد

أنسيتك أو ما عد غلاك أنروم

حطيتن علي بابك أقفال حديد

ف الحرب راك أنتا اللي مهزوم

كرت أنحرق ما عاد شي يفيد

أنساني خلاص ما عاد لك اللزوم

أنتا من حياتي اليوم راك طريد

رصيد أدمـــــــــــــــــــــــــــوع

اسمور أو شقا وأرياف في يلوع

أن جاني الليل انوض ناصب نوع

إيجي سيلهن حادر مع تنهيد

نبكي بعبرة أتشق في لضلوع

بكيـــــــة حنون أمفارقة الوليد

وطاحن أوراقي ، من علي لفروع

عدى العمر أو ما ألقيت سنيد

عبيت نا منهن اليوم رصيد ** ياس وعنا وجروح في أتكيد

( لا تذكرنا )

( لا تذكرنا )

الله و النبي يا عقل لا تذكرنا ** بلوعة عزيز زمان فيه اقهرنا

مـــــــــــــــــــــــــا تطريهم

اعزاز فارقونا وارتزينا فيهم

هنا بعد كنا اعزاز عليهم

ونحنا ف غلاهم يوم ما قصرنا

ما داروا الا الشينا الله يهديهم

باعوا غلانا واكسروا خاطرنا

من يومن غنوهم نا نهاتي بيهم

قلوا هنانا و الليول سمرنا

انكابي عقاب الليل ومراجيهم

كانيبا اسا يجي طيف ويصبرنا

الله و النبي يا عقل لا تذكرنا ** بلوعة عزيز زمان فيه اقهرنا

مــــــــــــــــــــــــــــا اتخطرهم

غوالي اللي كنا احدود نظرهم

وكنا انجوم الليل وان سهرهم

وكنا القمر ع الارض متصورنا

وكنا الفنار اللي علي جابرهم

وكنا اللي ما يحملوه سفرنا

وكنا الموج ف وان هاج بحرهم

نشايلوا ما عمر يوم اكسرنا

واليوم جا دوني ، غلا حجرهم

سبحانا اللي الغالي رضا ونفرنا

الله و النبي يا عقل لا تذكرنا ** بلوعة عزيز زمان فيه اقهرنا

 

خلاص انســــــــــــــــــــــاهم

وماعد علينا تجبدا مطراهم

غوالي اللي ياما زمان معاهم

من بير الغلا اشربنا وفيه جهرنا

انزازي وفارح بيه دوم غلاهم

خطمت به ع الياس نين نظرنا

حلف قال ما نطلق الا بفرقاهم

وايديرها بصحيح ما اصورنا

وفعلاً دارها وجانا نبا غنواهم

قالوا خذا سوك وياما خسرنا

يعوضني الله بصبر فيه خطاهم

واندير صوب جديد وينورنا

الله و النبي يا عقل لا تذكرنا ** بلوعة عزيز زمان فيه اقهرنا