( الليل )

هبا م الليل وجرنانا ,, جايب جانا ,, طيف اللي موحه كدانا 
هابا م الليل ومطراه ,, يجيب معاه ,, سريب اللي طول مرجاه  منيدي خطم ياس خذاه ,, برم خلانا ,, ف اوهام الغياب حزانا  جيوشه حالن بين دناه ,, وفيه رزانا ,, طيفاً كان احدود منانا  انكمل ف الليل امهاياه ,, الدمع ملانا ,, ع الخد ايقجن غدرانا 
هبا م الليل وتعذيبة ,, فيه الريبه ,, وفكار ورايات عطيبة  نجبد في موحه وسريبه ,, منّه دانا ,, وين اعلقنا فيه رخانا  جرحه ف الخاطر نشكيبه ,, ما هنانا ,, كي يدمى يا طول شقانا  ما نفعت فيه التطبيبه ,, لا كويانه ,, منا مقطوعات الوانا 
هبا من جرنان الليل ,, بعد يلفى يا طول شقاي  نشعر ونهاجي ونشيل ,, الصوت علي تبوزيع غلاي  ايديرن فوق اخدودي سيل ,, ايقجن قلالات هناي  يخطر بو مشي اتزعبيل ,, ايجي يدودش من يالاي  جميل وفيه الوصف ايخيل ,, قمر كان امضوي دنياي بو ميم اتقول قرابيل ,, ايضرن كان التفتن جاي  بو مضحك فيه اتشهليل ,, ان كان تبسم يبرا داي  سبب فرقاهم قال وقيل ,, سمع سهراية ناس اعداي  قالوا له فيّ مقاويل ,, تبعهم ما شاور ف الراي  رقد واصبح ناوي ع الشيل ,, حلف ما يقعد يوم احذاي  رحيله ساقوه معاجيل ,, الحقته عيط ياس وراي  جرحني بو ممشوط طويل ,, وخلاني غاطس ف ادماي متشوكل فيه اتشلشيل ,, الجرح اصاعب ع الداواي علي جرحه ما عندي حيل ,, انجض وهذا حد عزاي الخاطر منّه راح دقيل ,, وزاد افراقة قل هناي  لنا ما دز مراسيل ,, ولا ينشد عنا ف الجاي نصبر كان الصبر جميل ,, بعد لخوانا ,, من ناساً كانوا مشكانا
هبا م الليل وجرنانا ,, جايب جانا ,, طيف اللي موحه كدانا

( أعزوم )

( أعزوم )


مقوى عزم من خانه حبيب 
وعقب جرح يسايل ادما 


يقلب فيه داير له سريب 
جار عليه سطاره قوا


يزازي بيه يبيله طبيب 
وصابر بيش يلقى له دوا


يعاند بيه ف البخت العطيب 
وهو تعبان من كثر العنا


حتى النوم منا ما يطيب 
ولا ف نهار للراحة لقى 


خايف من عدادة العيب 
ان كان هو جض منا واشتكا


يقولوا وين عزمك يا العطيب 
عليك ابدوع ما شورك صغا


اللي ما قاس لذعات النصيب 
عنده حق يحكي ف الفضاء

( مالك علي ايمين )

( مالك علي ايمين )

راس البيت للشاعر / اكرم الكاسح الدرسي 

وهذه مشاركتي في راس البيت 

مالك علي ايمين ,, مازلت كي ما كنت حد الزين ,, سبحان خالقك

مازلت حد امالي

ومازلت في قلبي عزيز وغالي

ومازلت مشكاية وراحة بالي

ومازلت عندي خير م اللخيرن

انتا زهاي وفرحتي ودلالي

في طلتك يجلى جذار العين

كي جيت لوهامك اجي عدالي

تذكار يطربني انزيد حنين

يخطر علي ايامنا الخوالي

وين انتلاقوا نشبكوا ليدين

ونقعمزوا ماعد انحسوا والي

انعدوا النجوم وف القمر هايمين

ونقولك باللي خطر في بالي

بعطف وحنان وشوق وتغونين

سبحان خالقك يابو غثيث مدالي

كلا ف جمالك ما اختلفوا اثنين

( بهم يا حرة )

السلام عليكم ورحمة الله وبركاته

هذه اخر كتاباتي اهديها إلي الشعب الليبي الحر

وإلى روح الشهيد محمد رافع رحيل النعاس الورفلى

( ونيس العوامي )

بهم يا حرة

......................

بهم ياحرة زدتي عز ,, تريسك فز ,, الطاغي لز ,, بعد ما جانا متحزز

بهم ياحرة زدتي شان ,, تريسك وين ندهتي جوك

التموا لك من كل مكان ,, ارجالك بدماهم يفدوك

تنادوا صبوا ف الميدان ,, على مبدآهم ما خانوك

شباب اداعا ع النيران ,, من ايدين الطاغي فكوك

من بنغازي جا البيان ,, بلزة كل اللي اضلموك

القذافي ومعاه اعوان ,, اللي يا حرة ما هنوك

بكذب وتفتين وحرمان ,, وحتى حقك ما يعطوك

لاكن جوه تريس امتان ,, اصداره صبو ها الصعلوك

   و قالوا بالفم المليان ,, اطلع يا طاغي ما انريدوك

خوذ اعيالك و اللجان ,, وخوذ معاك اللي يبوك

اطلع يا جرذ الجرذان ,, وخوذ معاك نعيلة لبوك

الله ينعل عيت الشيطان ,, المرتزقة و اللي يوالوك

تريسك وقت الضيق أيبان ,, ايجوك كرز ,, يهزوا عرش الطاغي هز

بهم ياحرة زيدك عز ,, تريسك فز ,, الطاغي لز ,, بعد ما جانا متحزز 

بهم يا حرة رفرف فوق ,, الغالي بو نجمة وهلال

اللي يشوفه م الهم يروق ,, يخطر فرحة لاستقلال

على الحرة قاعد مطلوق ,, ألوانه مليانات دلال

حمر لو الدم ف لعروق ,, ودم شهدانا لبطال

اسود لون الكبد المحروق ,, علي مأساة الاحتلال

خضر لون اجنانات اتوق ,, بعد تحريرك من لنذال

ارجالك جوك وفيهم شوق ,, علي تخليصك م الدجال

يديروا ع الكتائب طوق ,, يلموهم من غير أقتال

يسوقوه ألقذافي سوق ,, امدنقر ومكتف بحبال

يردوا كل اللي مسروق ,, سوى حرية ولا مال

وتزهى يا وطني وتروق ,, وتو تحز ,, وتقعد ف العالم بارز

بهم ياحرة زدتي عز ,, تريسك فز ,, الطاغي لز ,, بعد ما جانا متحزز

( خذوه وعدوا )

خذوه وعدوا ,, في قيسم ماعد علينا ردوا ,, هفوا اقدم عقلي

خذوه أمعاهم 
 وهو زاد لازمته ايريد دناهم

ونا قبل نحسابه خلاص نساهم 
 وهو أتقول عارفهم أساع يردوا

يحايل علي أيقول هان غلاهم 
 وهو من وراي أيود بيش يودوا

أ تقول ما تعذب يوم في سباهم 
ولا تقول بنيانا غلانا هدوا

ولا تقول لذعونا بنار خطاهم 
 ولا تقول ب السية معانا بدوا

كل ما مشينا في طريق معاهم 
 هم يسبقونا و الدروب يسدوا

الله يسامحه هلي جبد مطراهم 
 ما عمرهم للخير ديهم مدوا

ولا بيش ما كافو أنرد أكفاهم 
مانا اللي انعيبوا ولا انتعدوا

خذوه وعدوا ,, في قيسم ماعد علينا ردوا ,, هفوا اقدم عقلي

شال في جرتم 
وين ما لفوله حددوا جلوتم

يحكي وديما يجيب في سيرتم 
 ننهوه يزعل نتركوا انتكدوا

يخطر علي زمان في غيتم 
وكيف كنا ف الاصواب انقدوا

أياماً وكنا نبرموا ف جلوتم 
 افجرة غلاهم نتعبوا ونكدوا

خذينا أيام أسماح في رفقتم 
 مع طيفهم طرف الحديث انشدوا

وسط القمر تطلعلنا صورتم 
 وياما قعدنا فالنجوم انعدوا

سبحان كي بدل الله حالتم 
 هانوا رفقنا من غلانا فدوا

خذوه وعدوا ,, في قيسم ماعد علينا ردوا ,, هفوا اقدم عقلي

( انظر ايش دارو بعدي )

ونيس العوامي

هذه الكلمات رد على قصيدة الشاعر اكرم الكاسح الدرسي

انظر اشدارو ابعدي,,ا نشا الله سعدهم موش كيف اسعدي,,اعزازن أقدم انظر

انظرنصيب خذاهم

 وانظر بغيري قارنين اسماهم

انظر بطولهم ولا أكبار ضناهم

 ولا كما حالي  أندور اوحدي

نشعر ونجبد في سريب غلاهم

 هذا اللي ألقيته ف قيس أجهدي

سبحان كيف كنا زمان معاهم

 متوالفين ما احسبنا غلانا ايغدي

ظروف احكمني و الزمان زواهم

ونا غير كملته العمر اطردي

ننشد عليهم كل من راعاهم

  ايش حال من كانوا زمان اسندي

انظر اشدارو ابعدي,,ا نشا الله سعدهم موش كيف اسعدي,,اعزازن أقدم انظر

( ما نحملهن )

هذه الكلمات مشاركتي في رأس بيت الشاعر خالد المجبري 

ورأس البيت ايقول 

( ما نحملهن ,, هموم واجدة ف القلب نا شايلهن ,, في غيبتك و الله )

مشاركتي ونيس العوامي

نعاني فيهن

أهموم يا أسلام الله واحل فيه

أن نضت ناضن شابكات أيديهن

ذاكراتني حتى ونا هاملهن

كي أنقول ننساهن إيجي طاريهن

من كل جيهه واجدات أسبلهن

يسيلن دموعي طول من مآقيهن

علي شوق ليا من أسماح عللهن

ولا يرقدن في ليل نين إيجيهن

طيف الغوالي أيطل ويذيبلهن

يا الله يا حنان تلطف بيهن

أبكاهن على الغياب زاد زعلهن